අභිනව චන්ද්‍ර වර්ෂය සඳහා අප්‍රේල් මස 11 ගුරු දින සහ අභිනව සූර්ය වර්ෂය සඳහා මැයි මස 10 වන සිකුරාදා දින නව සඳ බැලීම මැනවි.
අප්‍රේල් මස 11 වන බ්‍රහස්පතින්දා දින බෝපත් යුෂ මිශ්‍ර නානු ගා ස්නානය කොට සිය ඉෂ්ට දේවතා අනුස්මරණයෙහි යෙදීම මැනවි.
අප්‍රේල් මස 13 වන සෙනසුරාදා අපර භාග 02.41 සිට එළඹෙන 14 වන ඉරිදා පූර්ව භාග 03.29 දක්වා පුන්‍ය කාලය බැවින් අප්‍රේල් මස 13 වන ශනි දින අපර භාග 02.41 ට පෙර ආහාර පාන ගෙන සියලු වැඩ අත්හැර ආගමික වතාවත් වල යෙදීම ද, එදිනම අපර භාග 09.05 සිට පසු දින පූර්ව භාග 03.29 දක්වා කාලය තුළ ආහාර පිසීම, වැඩ ඇල්ලීම, ගණුදෙනු කිරීම හා ආහාර අනුභවය ආදී නැකත් චාරිත්‍ර ඉටු කිරීම මැනවී.
අප්‍රේල් මස 13 වන සෙනසුරාදා අපර භාග 11.06 ට (රාත්‍රී) නීල වර්ණ හෙවත් නිල් පැහැති වස්ත්‍රාභරණයෙන් සැරසී දකුණු දිශාව බලා ලිප් බැඳ ගිනි මොළවා තල උක් හකුරු මිශ්‍ර කිරි බතක් සහ තල මිශ්‍ර කැවිලි වර්ගයක් ද පිළියෙල කර ගැනීම මැනවි.
අප්‍රේල් මස 13 වන සෙනසුරාදා මධ්‍යම රාත්‍රී 12 පසුවී විනාඩි 06 ට හෙවත් අප්‍රේල් මස 14 වන ඉරිදා පූර්ව භාග 00.06 ට නීල වර්ණ සපිරි වස්ත්‍රාභරණයෙන් සැරසී දකුණු දිශාව බලා සියලු වැඩ අල්ලා ගණුදෙනු කොට ආහාර අනුභව කිරීම මැනවි.
අප්‍රේල් මස 15 වන සඳුදා දින පූර්ව භාග 10.17 ට ස්වේත වර්ණ වස්ත්‍රාභරණයෙන් සැරසී දකුණු දිශාව බලා හිසට දිවුල් පත් ද, පයට ඉඹුල් පත් ද තබා දිවුල් පත් යුෂ මිශ්‍ර නානු හා තෙල් ගා ස්නානය කිරීම මැනවි.
අප්‍රේල් මස 17 වන බදාදා පූර්ව භාග 06.52 ට පලා වර්ණ වෙත් කොළ පැහැති වස්ත්‍රයෙන් සැරසී, ගිතෙල් සහ හකුරු මිශ්‍ර කිරි බතක් සහ කැවිලි වර්ගයක් අනුභව කර උතුරු දිශාව බලා පිටත්ව යාම මැනවි.
අප්‍රේල් මස 18 වැනි බ්‍රහස්පතින්දා පුර්ව භාග 10.16 ට රන්වන් වූ වස්ත්‍රයෙන් සැරසී නැගෙනහිර දිශාව බලා පැළ සිටුවීම මැනවි.
